கணினியைப் பயன்படுத்துபவர்கள் ஒவ்வொருநாளும் புதிய புதிய யுத்திகளை கற்றுக்கொள்ளவேண்டியது காலத்தின் கட்டாயம். அந்த வகையில் விண்டோஸ் வினைக்கலனின் (operating system) பதிவகம் பற்றிய சில தொழில்நுட்பக் கூறுகளையும் அவற்றை நடைமுறையில் பயன்படுத்துவது, அவற்றின் மூலமாக கணினியின் நிலைத்தன்மையை அதிகப்படுத்துவது, மற்றும் பதிவகத்தில் ஏற்படும் கோளாறுகளால் கணினி செயலிழந்து விடும் நிலையில், அதிலிருந்து மீட்பது போன்றவற்றைப் பற்றி ஆய்வதே இந்தக் கட்டுரையின் நோக்கம்.

பதிவகம் ஒரு தகவல் கருவூலம்
கணினியின் வண்கலன், மென்கலன் மற்றும் பிற பயன்பாட்டு நிரல்கள் பற்றிய புள்ளிவிபரங்கள், அவைகளைப் பயன்படுத்துவதற்கான துணை நிரல்கள் மற்றும் நிறம், எழுத்துரு போன்ற பயனர் செய்த அமைப்பு வேறுபாடுகள் அனைத்தையும் பதிந்து வைத்து ஒவ்வொருமுறையும் கணினி செயல் பாட்டுக்கு வரும்பொழுது அவைகளைத் தந்துதவும் தகவல் தளமே "பதிவகம்".

விண்டோஸ் வினைத்தளத்தில் (operating system) INI நீட்டிப்புகளைக் கொண்ட கோப்புகளும் இதே பணிக்காகவே பயன்படுத்தப்படுகின்றன. எடு  SYSTEM.INI, WIN.INI மற்றும் பல. ஆனால் பதிவகம் இந்த INI கேப்புகளை விட பல புதிய வசதிகளைக் கொண்டது. பதிவகத்தில் தகவல்கள் மையப்படுத்தப்பட்டுள்ளதால் பிற நிரல்களால் அவற்றைப் எளிதில் பயன்படுத்தமுடியும். மேலும் மிக அதிக அளவில் தகவல்களை ஒரு ஒழுங்கு படுத்தப்பட்ட படிநிலையில் அமைக்கமுடிவதால் பதிவகம் INI கேப்புகளின் தேவையை வெகுவாகக் குறைத்துவிட்டது.

பதிவகம் முதன் முதலில் விண்டோஸ் 3.1ல் பயன்படுத்தப் பட்டுள்ளது ஆனால் இங்கு அதன் பயன்பாடு மிகக் குறைவு. பின்னர் இது விண்டோ ஸின் 32 பிட்டு வினைத்தள வரிசையில் விண்டோஸ் 95/98/NT/2000/ME ஆகியவற்றில் முழுவீச்சில் பயன்படுத்தப்பட்டுவருகிறது.
ஒவ்வொருமுறையும் புதிய மென்பொருள்கள் கணினியில் ஏற்றப்படும் போது அவை பற்றிய முழு விபரங்களும் பதிவகத்தில் சேமிக்கப்படுகின்றன. அத்தகைய மென்பொருள்கள் இயங்குவதற்கு தேவையான துணை மென்பொருள்கள், அவை சேமித்து வைக்கப்பட்டுள்ள கோப்பகங்களின் பாதை போன்றவை தெளிவாகப் பதிவு செய்யப்பட்டு, மென்பொருள் இயக்கத்திற்கு சரியான முறையில் உதவுகின்றன. இதுமட்டுமல்லாது பயனார் தனது கணினியின் கட்டமைப்பில் செய்யும் மாறுபாடுகள், அவற்றோடு இணைக்கப்பட்டுள்ள உபகரணங்கள் மற்றும் அவற்றிற்கான செயலிகள் போன்றவற்றையும். குறித்த முறையில் பதிவு செய்து கணினி பிழையின்றி இயங்க உதவுகிறது.

பதிவகத்தில் ஏதாவது பழுது ஏற்படுமாயின் அது கணினியின் இயக்கத்தை மிக மோசமாக பாதிக்கும். ஏன் சில நிரல்களை இயக்கவே முடியாது. சில துணை நிரல்களின் பாதைகள் அறுந்து அவை அவற்றின் தாய் நிரல்களால் பயன்படுத்தபட முடியாமல் முடங்கிவிடும் அல்லது சில சமயங்களில் வினைத்தளத்தினுள்ளேயே செல்ல முடியால் கூட போய்விடலாம்.

இத்தகைய பதிவகம் எவ்வாறு வடிவமைக்கப்பட்டுள்ளது, விணைத்தளம் அதை எவ்வாறு பயன்படுத்துகிறது என்பதை பற்றி காண்போம்.

பதிவகத்திற்கான கோப்புகள்
பதிவகம் விண்டோஸ் வினைத்தளத்தின் வெவ்வேறு வெளியீட்டில் வெவ்வேறு இடங்களில் இருத்தப்பட்டுள்ளது. விண்டோஸ் 95 மற்றும் 98ல் பதிவகத்திற்கான கோப்புகள் விண்டோஸ் கேப்பகத்தில் USER.DAT மற்றும் SYSTEM.DAT என்ற பெயரில் வெறும் எழுத்துக்கோப்புகளாக பார்வைக்கு மறைக்கப்பட்ட நிலையில் (HIDDEN TEXT FILES) சேமிக்கப்பட்டுள்ளன. விண்டோஸ் ME வினைத்தளத்தில் மேற்கூறிய கோப்புகளோடு கூடுதலாக CLASSES.DAT என்ற கோப்பும் இணைக்கப்பட்டுள்ளது. ஆனால் இவை விண்டோஸ் NT மற்றும் 2000 போன்ற வலைசார்ந்த வினைத்தளங்களில் அதன் முதன்மை கோப்பகத்திலுள்ள SYSTEM32\CONFIG
என்னும் கோப்பகத்தில் சேமிக்கப்பட்டுள்ளன.

இந்த பதிவகம் சார்ந்த கோப்புகளை நாம் நேரடியாகத் திறந்து மாற்றங்கள் எதையும் செய்துவிட முடியாது. அதற்காக வினைத்தளங்கள் REGEDIT என்னும் உதவி நிரலை தன்னுள் கொண்டுள்ளன. இவற்றின் மூலமே நாம் பதிவகங்களைத் திறக்கவும் அவற்றின் பதிவுகளை மாற்றியெழுதவும் முடியும்.

பதிவகத்தின் அமைப்பு
பதிவகம் அதிகாரப் படிநிலை கட்டமைப்பில் (hierarchical structure)உருவாக்கப்பட்டுள்ளது. மேல் நிலையில் "என்கணினியில்" தொடங்கி படம்-1 (விண்டோஸ் NT யிலிருந்து எடுக்கப்பட்டது) ல் உள்ள படி ஆறு இரண்டாம் நிலைப் படிகள் உள்ளன. இந்த முக்கிய கிளையில் உள்ள ஆறு வகைகளையும் நாம் கூடு என்று அழைக்கலாம்.

கூடு 1 - HKEY_CLASS_ROOT
கூடு 2 - HKEY_CURRENT_USER
கூடு 3 - HKEY_LOCAL_MACHINE
கூடு 4 - HKEY_USERS
கூடு 5 - HKEY_CURRENT_CONFIG
கூடு 6 - HKEY_DYN_DATA (இந்த கூடானது விண்டோஸ் NT/2000 ல் இல்லை)

ஒவ்வொரு கூட்டிலும் குறிகள்(KEYS) எனப்படும் துணைக்கிளைகள் உள்ளன- மேலும் ஒவ்வொரு குறியும் தன்னுள் துணைக்குறிகள், மதிப்புகள், என படிநிலையில் கிளைகள் விரிந்துபட்டு போகும். இஃது ஒரு தலைகீழாக வைக்கப்பட்ட மரத்தைப் போன்றது. முதலில் வேர்ப்பாகமாகிய என்கணினியில் (MY COMPUTER) ஆரம்பித்து, ஆறு முக்கிய கிளைகளுடன், ஒவ்வொரு கிளையும் விரிந்து நுனியை நோக்கி செல்வது போல.
( பார்க்க படம் -2 விண்டோஸ் NT யிலிருந்து எடுக்கப்பட்டது)

நமது கட்டுரையில் ஒரு குறியைக் குறிக்கும் பொழுது அதன் மேல்நிலையில் தொடங்கி "\" என்னும் குறியைப் பயன்படுத்தி விரித்து
எழுதுவோம். எ.டு. HKEY_CLASS_ROOT\Software\Classes

கூடு 1 - HKEY_CLASS_ROOT

இதன் முக்கிய பணியானது

அ) கேப்புகளின் வகைகளையும், அவற்றோடு தொடர்புடைய மென்பொருள்களையும் அடையாளம் காட்டுவது.

எடுத்துக்காட்டாக "DOC" என்ற நீட்டிப்பைக் கொண்ட  கோப்புகளை நாம் சுட்டியால் தட்டி
திறக்கும்பொழுது அவை மைக்ரோசாப்ட் வேர்டு மென்பொருளின் உவியோடு மட்டுமே திறக்கப்படுவதை காணமுடியும். அது போலவே, பிற XLS, TXT மற்றும் பல கணினியில் ஏற்றப்பட்டுள்ள கேப்புகளின் நீட்டிப்பு வகைகளும் அவைகளோடு தொடர்புடைய மென்பொருள்களின் பெயர்களும் இங்கு சேமிக்கப்பட்டுள்ளன.

ஆ) OLE - வசதிக்கான தகவல்கள், மற்றும் மொன்பொருளோடு தொடர்புடைய அனைத்து விபரங்கள்.

படவுரு (ICON), விளக்கப் பெயர், மற்றும் சுட்டியின் வலது பொத்தனை தட்டும் போது வரவேண்டிய
பட்டியின்(MENU) உள்ளடக்கம் மற்றும், மென்பொருள்களுக்கான துணைநிரல்களின் பாதைகள் மற்றும் குறியீடுகள்.

கூடு 2 - HKEY_CURRENT_USER

இங்கு பயனார் மற்றும் அவர் சார்ந்த தகவல் பதிவுகள் இடம் பெற்றிருக்கும். நமது கணினியை ஒன்றுக்கு மேற்பட்டவர் பயன்படுத்தும் வகையில் அமைக்கும் பொழுது, ஒவ்வொரு பயனாருக்கும் தனித்தனி அமைப்புகளை நிறுவமுடியும்.
அவ்வாறு அமைக்கும் பொழுது ஒவ்வொரு பயனாருக்கும் தனியே சத்தங்கள், படங்கள், நிலைத்திரையில்(DESKTOP) காணப்படும்
படவுருக்கள் வேறுபட்டிருக்கும். இவை இந்த கூட்டில் காணப்படும் AppEvents என்னும் குறியின் கீழ் பதியப்பட்டுள்ளன.
(HKEY_CURRENT_USER\AppEvents)

அடுத்ததாக கட்டுப்பாட்டு பளகத்தின் முக்கிய செயல்களின் அமைப்புகள் ControlPanel என்னும் துணைக்குறியின் கீழ் பதியப்படுகிறது. (HKEY_CURRENT_USER\ControlPanel) நாம் செய்யும் மாறுபாடுகள் உடனுக்குடன் பதிவகத்தில் எழுதப்படுகின்றன.

அடுத்த முக்கிய கிளையானது Software (HKEY_CURRENT_USER\Software) ஆகும். இங்கு கணினியில் ஏற்றப்பட்டுள்ளஅனைத்து மென்பொருள்களின் விபரங்கள், அவைகளின் அமைப்புகளில் உள்ள மாறுபாடுகள் போன்றவை பதியப்பட்டுள்ளன எடுத்துக்காட்டாக சில சமயம் சில மென்பொருள்களை இயக்கும் பொழுது அவைகள் திரையில் சிறிய அளவான விண்டோ வில் தோன்றுவதைக் காணலாம். நமது வோ஢டு (MS-WORD) மென்பொருளில் சில சமயங்களில் பல கருவிப்பட்டைகள் (toolbars) காணாமல் போயிருக்கும், பின்னர் அவைகளை நாம் தருவித்துக் கொண்டால் அதன் பின் இயக்கும் ஒவ்வொரு முறையும் அவை தோன்றும். மேலும் தனிப்பயனுக்காக ஒவ்வொரு பயனாரும் மென்பொருளில் செய்யும் மாறுபாடுகள் தெளிவாக குறித்து வைத்துக்கொள்ளப்படும்.

கூடு 3 - HKEY_LOCAL_MACHINE

அடுத்த முக்கிய கிளையான HKEY_LOCAL_MACHINEல் அக்கணினி சம்பந்தப்பட்ட அனைத்து தகவல்களும் அடக்கம் முறையே வண்கலனின் முக்கிய பாகங்கள், பிற உபகரணங்கள், கணினியின் பொருத்தப்பட்டுள்ள சிப்புகளின் வகை, வேகம், வண்தட்டுகளின் அளவு என பட்டியல் நீண்டு கொண்டே போகும்.

HKEY_LOCAL_MACHINE என்னும் கூட்டில் காணப்படும் Software என்னும் கிளையானது கணினிக்கும், அதில் ஏற்றப்பட்டுள்ள மென்பொருளுக்குமிடையில் தொடர்புள்ள தகவல்களைப் பதிந்துவைத்துள்ளது. அதேசமயத்தில் HKEY_CURRENT_USER\Software என்னும் கிளையானது மென்பொருளின் பயனார் செய்த தனிப்பயன் மாற்றங்களை பதிந்து வைத்திருக்கும்.

கூடு 4 - HKEY_USER

பயனார் செய்த தனிப்பயன் மாற்றங்களை நிரந்தரமாக பதிந்து வைத்திருக்கும். இந்த கூடானது HKEY_CURRENT_USERடன் ஒரே தகவலையே பகிர்ந்து கொள்ளுகிறது. ஒவ்வொருமுறையும் பயனார் கணினியைத் துவக்கும் பொழுது. அவர் செய்த தனிப்பயன் மாற்றங்கள் HKEY_CURRENT_USER கூட்டில் எழுதப்படுகின்றன. இந்நிலையில் HKEY_CURRENT_USER கூடு HKEY_USERன் ஒரு பிரதியாக செயல்படும்.

கூடு 5 - HKEY_CURRENT_CONFIG

இந்தக் கூடும் கணினியின் அப்போதைய வண்கலன், அதோடு இணைக்கப்பட்டுள்ள பிற கருவிகளின் தகவல்களைக் கொண்டிருக்கும்
இது நாம் ஏற்கனவே பார்த்த HKEY_LOCAL_MACHINE\Config என்னும் கூட்டின் தகவலையே சுட்டிக்காட்டிக் கொண்டிருக்கும்.
இது கூடு விண்டோஸ் NT மற்றும் 2000 னில் சிறிது வேறுபடும்.

HKEY_CURRENT_CONFIG\Config என்னும் கிளைக்குப் பதிலாக
HKEY_CURRENT_CONFIG\System\CurrentControlSet\Hardware\Profile என்னுமிடத்தில் எழுதப்பட்டிருக்கும்.

கூடு 6 - HKEY_DYN_DATA

இங்கு விண்டோஸ் விணைத்தளத்தின் முக்கிய வசதியான PLUG AND PLAY க்கான தகவல்களைப் பதிந்து வைத்திருக்கிறது இந்த கூடானது ஒவ்வொரு முறையும் கணினி துவக்கப்படும் போதும் எழுதப்பட்டு பின்னர் நிறுத்தப்படும் போது அழிக்கப்படுகிறது
ஒவ்வொரும் முறையும் புதிய கருவிகளை கணினியில் இணைக்கவோ, நீக்கவோ செய்யும் போது இக்கூடானது அந்த தகவல்களை உடனுக்குடன் எழுதிக்கொள்ளும். இது விண்டோ ஸின் NT/2000 வினைத்தளங்களில் இணைக்கப்படவில்லை.

பதிவகத்தில் மாற்றங்கள் செய்வது எப்படி

நீங்கள் நினைப்பது போல பதிவகத்தில் மாற்றங்கள் செய்வது அவ்வளவு கடினமானது அல்ல. ஆனால் நீங்கள் அதைப் பற்றி மேலோட்டமாகவாவது புரிந்து கொள்ளவேண்டும். அது மட்டுமல்லாது மாற்றங்களைச் செய்வதற்கு முன்னால் அதனை பிரதி எடுத்துக்கொள்ளவேண்டியது அவசியம். அப்பொழுதுதான் ஏதாவது தவறு நிகலின் உடனே முந்தைய பிரதியைப் பயனபடுத்தி கணினியை இயக்க முடியும்.

பதிவகத்தை திறந்து எழுதுவதற்கான முக்கிய நிரல் மைக்ரோஸாஃப்ட் நிறுவனத்தால் அளிக்கப்படும் REGEDIT.EXE. மேலும் விண்டோஸ் NT மற்றும் 2000 னில் கூடுதலாக REGEDT32.EXE என்னும் செயலியும் உள்ளது இது REGEDIT.EXE ல் செய்யமுடியாத NT வினைதளம் சார்ந்த மாற்றங்களைச் செய்யப்பயன்படுகிறது.

எடுத்துக்காட்டாக நாம் நமது கணினியின் internet Explorer ன் கருவிப்பட்டையின் பின்புலத்தில் ஒரு படத்தை (பிட்மேப்), பதிவகத்தை திருத்துவதன் மூலம் தோன்றும்படி செய்வது எப்படி என்பதைப் பார்ப்போம்.
இது HKEY_CURRENT_USER\Software\Microsoft\Internet Explorer\Toolbar என்னும் குறியை(key) திருத்துவதன் மூலம் சாதிக்கமுடியும். (படம் -3)

படிப்படியாக கீழ்கானும் கட்டளைகளை கொடுத்துவாருங்கள்

அ) Regedit.exe என்னும் நிரலுக்கு, படவுருக்களை(ICON) உங்களது நிலைத்திரையிலோ(desktop) அல்லது முக்கிய பட்டியிலோ பார்க்கமுடியாது ஆதலால் start பொத்தனை அழுத்தி RUN என்னும் கட்டளையைத் தெரிவு செய்யுங்கள் அங்கு regedit என்று தட்டச்சு செய்து Enter விசையை அழுத்தவும்.

ஆ) இப்பொழுது நீங்கள் படம் -4 ல் காணப்படும் செயலியைத் திரையில் காணலாம். ஒவ்வொரு கூட்டிற்குமுன்னே ஒரு கூட்டல் குறி போடப்பட்டுள்ளது அதாவது நீங்கள் கூட்டல் குறியில் சுட்டியைத் தட்டி அதன் கிளையை விரிவுபடுத்தலாம்.

1. HKEY_CURRENT_USER கூட்டை விரிவுபடுத்துங்கள்
2. அதன் கீழுள்ள Software என்னும் கிளையையும் விரிவுபடுத்துங்கள் ( ஒவ்வொரு முறையும் செயலியின் வலது புறத்தில் ஏற்படும் மாறுபாடுகளை பொருட்படுத்த தேவையில்லை)
3. Micrsoft கிளையையும் விரிவுபடுத்துங்கள் பிறகு தொடர்ந்து Internet Explorer என்னும் கிளையையும் விரிவுபடுத்தவும்
4. அடுத்ததாக அங்கு காணப்படும் Toolbar என்னும் குறிக்கு வாருங்கள் அதன் கிளையை விரிவுபடுத்த தேவையிலை.
5. சுட்டியால் தட்டி Toolbar குறியை தெரிவு செய்யவேண்டும் இப்பொழுது செயலியின் வலது புறத்தில் ஒன்று அல்லது இரண்டு பெயர்களும் அதன் மதிப்புகளும் கொடுக்கப்பட்டிருக்கும்
(எடு) (Default REG_SZ (value not set) என காணப்படும்.
6. வலது பத்தியில் சுட்டியின் வலது பொத்தனை அழுத்தினால் வரும் பட்டியில் New என்பதை தெரிவு செய்யுங்கள்
7. அடுத்ததாக வரும் துணைப்பட்டியில் "String Value" என்னும் கட்டளையைத் தெரிவு செய்யுங்கள்
இப்பொழுது New Value #1 என்னும் புதிய பெயர் தோன்றும்.
8. புதிதாக தோன்றிய பெயரில் சுட்டியின் வலது பொத்தனால் தட்டவும். மீண்டும் புதிய பட்டி (Menu) அதில் Rename கட்டளையைத் தெரிவு செய்யவும்.
9. நீங்கள் உபயோகிப்பது Internet Explorer வெளியீடு 4.0 இருந்தால் அங்கு BackBitmap என்று தட்டச்சு செய்யவும் அல்லது வெளியீடு 5.0 ஆக இருந்தால் BackBitmapIE5 என்று தட்டச்சு செய்து enter விசையைத் தட்டவும்.
10. மீண்டும் சுட்டியால் BackBitmap அல்லது BackBitmapIE5 இருமுறை(double click)சுட்டவும்
11. தோன்றக்கூடிய விண்டோ வில் நீங்கள் விரும்பும் பிட்படத்தின் (BMP file) பாதையை தந்து ENTER விசையைத் தட்டவும்.
எடு C:\WINDOWS\MYBMP.BMP

வெற்றிகரமாக நாம் பதிவகத்தில் மாறுபாடுகள் செய்து முடித்துவிட்டோம். நீங்கள் திறந்திருக்கின்ற உலவிகளை மூடி விட்டு மீண்டும் திறந்தல் வேண்டும். உங்களால் அதன் கருவிப்பட்டையின் பின்புறத்தில் நீங்கள் தந்த படம் தேன்றுவதைக் காண முடியும். இத்தகைய படங்களை உங்களது PAINT செயலிகளின் உதவிகொண்டு நீங்களே வரைந்து கொள்ள முடியும். உலவியின் கருவிப்பட்டையின்பின்புறம் மாற்றம் செய்தபின் எடுத்த படத்தை வலப்புறம் காண்க.

படங்களை நீக்கவேண்டுமென்றால் அதே இடத்திற்கு சென்று, BackBitmap அல்லது BackBitmapIE5 சுட்டியால் தெரிவு செய்து DELETEவிசையை அழுத்தி அழித்துவிடவும்.

பதிவகத்தின் பழுதுகளை நீக்குவது எப்படி

ஏதேனும் தவறு நிகழ்ந்து விட்டதா? பதிவகக் கோளாரின் காரணமாக வினைத்தளத்துள் செல்ல முடிய வில்லையா கவலை வேண்டாம் விண்டோஸ் ஒவ்வொருமுறையும் சரியான பதிவகத்தை நினைவகத்தில் ஏற்றும் முன்பு அதனை ஒரு நகல் எடுத்து வைப்பது வழக்கம். அதை பயன்படுத்தி பாதிக்கப்பட்ட பதிவகத்தை நீக்கிவிட்டு புதிய நகலை அவ்விடத்தில் வைத்து விடலாம்.

விண்டோஸ் 95/98 வினைத்தளத்தில்:

நாம் ஏற்கனவே கூறியது போல User.dat, System.dat போன்ற கோப்புகள் உங்களது விண்டோஸ் கேப்பகத்தில் முறையே user.da0, system.da0 என்ற பெயரில் நகல் எடுத்து வைக்கப்பட்டிருக்கும் அவை படிக்க மட்டுமே அனுமதிக்கப்பட்ட(read only) மறைத்து வைக்கப்பட்ட கோப்புகளாக இருக்கும். நீங்கள் இவற்றை விண்டோஸ் வினைத்தளத்தில் இருந்து படிக்க, மாற்ற முடியாது. ஆகவே.

கணினியை மீண்டும் துவக்குங்கள் (RESTART)
துவக்கப்பகுதியிலேயே விண்டோஸ் வினைத்தளத்திற்குள் நுழையும் முன்பு விசைப்பலகையின் F8 விசையை அழுத்தவும். அங்கிருந்து
MS-DOS வினைத்தளத்தினை தேர்வு செய்யவும்.

பின்னர்

CD WINDOWS என்ற கட்டளையை தந்து WINDOWS கோப்பகத்தில் நுழையவும்
DIR *.DA0 என்ற கட்டளையை கொடுத்து கோப்புகள் இருப்பதை உறுதி செய்து கொள்ளலாம்

ATTRIB -H -R -S SYSTEM.DAT
ATTRIB -H -R -S SYSTEM.DA0
ATTRIB -H -R -S USER.DAT
ATTRIB -H -R -S USER.DA0

போன்ற கட்டளைகளைக் கொடுத்து கோப்புகளின் பண்புகளை மாற்றியமைக்க வேண்டும் அப்பொழுதுதான் நாம் அவற்றை பார்க்க, எழுத முடியும்.

பின்னர்
COPY SYSTEM.DA0 SYSTEM.DAT
COPY USER.DA0 USER.DAT

என்ற கட்டளைகளின் மூலம் நகல்களை அதன் அசல் பெயரில் எழுதிவிடமுடியும்.
தேவையானால் மீண்டும் கீழ்கண்ட கட்டளைகளின் மூலம் கோப்புகளின் பண்புகளை மாற்றிவிடவும்
(will become read only, system file, and hidden)

ATTRIB +H +R +S SYSTEM.DAT
ATTRIB +H +R +S USER.DAT

கணினி மீண்டும் தயார் நிலைக்கு வந்துவிட்டது. மின் இணைப்பைத் துண்டித்து மீண்டும் துவக்குங்கள்.. உங்களால் உங்களது பழைய நிலைக்குச் செல்ல முடியும்

(குறிப்பு : விண்டோஸ் NT/2000 வினைத்தளங்களில் பதிவகத்தில் ஏற்படும் கோளாற்றைச் சரிசெய்ய தேவையான வழிமுறைகளை நான் இக்கட்டுரையில் தரவில்லை)

முடிவாக....

விண்டோஸ் வினைத்தளத்திற்கு மென்பொருள்களை எழுதும் வல்லுநர்கள், பதிவகம் பற்றி நன்கு அறிந்திருக்கவேண்டும். அவர்களது நிரலி வினைத்தளத்தின் தேவையான பகுதிகளை சிறப்பாக பயன்படுத்திக்கொள்ள அவை சரியான முறையில் பதிவகத்தில் பதியப்படவேண்டும்.

முழுமையான் தொழிநுட்பத்தகவல்களைத் தருவது இந்த கட்டுரையின் நோக்கமில்லையாதலால் மேலோட்டமாக அனைத்து பயனாரும் அறிந்திருக்கவேண்டிய தகவல்களை மட்டும் தொகுத்து தந்துள்ளேன். இது உங்களுக்கு பயனுள்ளதாக இருக்கும் என்றும் நம்புகிறேன்.

மா.பரமேஸ்வரன்
Systems Analyst, ahainfo.com, Dubai.
உங்களது விமரிசனங்களை எழுதுங்கள் param@emirates.net.ae